Suportaran ti Department of Labor and Employment ti panawagan para iti ad-adu pay nga earthquake drill kadagiti amin nga establisimiento ken lugar ti trabaho iti intero a pagilian kalpasan dagiti nagsasaruno a gingined iti nadumaduma a paset ti pagilian.
Segun ken ni Labor Secretary Bienvenido Laguesma, ti panangisakit ken adbokasiya para iti kinatalged ken salun-at iti trabaho ket shared responsibility dagiti mangmangged, employer, ken gobierno.
Immunan a nagpanawagan ti Trade Union Congress of the Philippines para iti ad-adu pay a drill tapno maipakaammo kadagiti mangmangged ken employer dagiti protocol iti kinatalged iti panawen ti gingined ken dadduma pay a didigra.
Para iti TUCP, ti masansan a pannakaisayangkat ti drill ket nasken a gundaway met para iti emergency preparedness meeting, agraman ti panangipakaammo ti karbengan dagiti mangmangged.
