Inallukoy ti Department of Labor and Employment dagiti mangmangged a napilit a sumrek iti trabaho iti baet ti saan a nasayaat a paniempo kadagiti naglabas nga aldaw nga ireport ti employer-da para iti posible a panaglabsing iti Republic Act 11058 wenno ti Occupational Safety and Health Law.
Segun ken ni Bureau of Working Conditions Director Alvin Curada, dagiti employer a nagbiddut ket mabalin a maidalan iti administrative fine wenno muelta depende iti lebel ti peggad ken kondisyon kadagiti kompaniada.
Immunan a nagpalagip ti DOLE kadagiti mangmangged nga adda karbenganda a saan a sumrek iti trabaho gapu iti kinapeggad ti panawen.
Kaaduan kadagiti lugar, agraman ti Metro Manila ket nakapadas iti napigsa a tudo gapu iti bagyo Crising, Dante ken Emong kasta payen ti habagat.
