Nangiruar ti Department of Labor and Employment (DOLE) ti baro a guidelines tapno masigurado ti salaknib iti pagsayaatan, kinatalged ken karbengan dagiti ubbing nga awan pay iti sangapulo ket lima a tawenna a karaman iti entertainment ken information industry.
Iti salinong ti Labor Advisory No. 12, Series of 2026 a pinirmaan ni Labor Secretary Francis Tolentino, napalagipan dagiti nagannak ken legal guardian a siguradoen a masursurot dagiti maipatpatungpal a linteg iti panagtrabaho dagiti ubbing iti pelikula, telebisyon, radyo, teatro, advertisement ken dadduma pay a media platforms.
Maibasar ti Republic Act No. 9231, maiparit iti panagtrabaho dagiti ubbing nga awan pay iti sangapulo ket limna a tawenda malaksid no isuda ket agtrabtrabaho iti salinong ti direkta a panangidaulo dagiti nagannak wenno legal guardian ken ti laeng miembro ti pamilia iti kadua ti trabaho wenno no napateg ti partisipasion iti public entertainment wenno information.
Impaganetget ti DOLE a kasapulan a mangala pay ti work permit manipod ahensia sakbay a palubosan nga agtrabaho iti maysa nga ubing nga awan pay iti sangapulo ket lima a tawenna kadagiti nasao nga aramid.
Sakup ti public entertainment wenno information dagiti panagperform ken produksyon para iti telebision, radyo, pelikula, teatro, commercials, public relations campaigns, print materials, internet ken dadduma pay a klase iti media.
