VIGAN CITY- Mapapati a napatumaran ti date rape drugs ti maysa a doktor a nakalibas manipud kadagiti nangdukot kenkuana isu a saan na a malagip no kasano a dinukot dagiti kidnapper idiay Pangasinan.
Maipalagip a nasarakan iti dwa a babai ken ti dati a konsehal a ni Wilhelm Aquino ni Dr. Leif Paul Dumbrique, tubo ti Pagpartian, Vigan City ngem naikamang idiay Libtong East, Lingayen, Pangasinan nga adda iti igid ti kalsada a narugit ken awan iti usto a panonot.
Iti pannakaiuman ti Bombo Radyo Vigan kenni Jasmin Rusibin, taga Pagpartian, Vigan City , posible a pinagtumar da iti kabsat na ti droga a Rohypnol isu a saan na a malagip dagiti napasamak.
Segun kenni Jasmin , ti laeng malagip ti kabsat na ket idi adda isunan iti uneg ti daan a pick-up ket adda dwa a lalaki a kadwa na a nakagalot ti ima na ken awan iti usto a panagpanonot.
Inyistorya ni Jasmin nga idi nadlaw ni Dr. Dumbrique a bimmontog ti taray ti lugan ket kinugtaran na ti ruangan ket idi naglukat, limmagto ken timmaray iti adayo.
Kinamat pay laeng isunda dagiti suspek ngem nakalibas ken nagpatulong kadagiti tao a nakita na nga isu iti nangitulod kenkuana iti police station.
Idi immuna ket inpagarup dagiti pulis nga agmaoyong ti doktor ta narugit iti bagi na, kultap ti bouk na ken saan na a malagip ti nagan na a posible nga epekto ti agas a naipatumar kenkuana.
Nakumpirma laeng a doktor isuna kalpasan a nakita dagiti otoridad ti asawa na a doktor ken kabsat na nga abogado babaen ti social media.
Addan iti natalged a kasasaad ti biktima.
Maipalagip a mapan kuma umatendar ti conference idiay Metro Manila ti dokrtor idi dinukot isuna dagiti suspek.
