Pagan-annaden ti Department of Health ti publiko kadagiti sakit a mabalin a maala ita a panawen ti kalgaw.
Maibasar iti advisory ti DOH, dakkel ti peggad ti heat exhaustion ken heat stroke – dagiti kondision a mabalin a kumaro ken makapatay no saan a masigudan.
Sumagmamano kadagiti sintomas ti heat stroke ket ti gurigor, panagulaw, pannakaattang, kaawan ti puot, ken nabara wenno lumabbaga a kudil.
Binalakadan ti DOH ti publiko a suroten ti Heat Health Reminders tapno natalged ken maliklikan ti ania man a sakit ita a nabara ti paniempo.
Liklikan ti agubra iti nadagsen manipud alas nuebe iti agsapa agingga alas kuatro iti malem; uminom iti 7-8 a baso ti danum iti inaldaw; agaramat iti payong, paid, wenno kallugong no rummuar iti pagtaengan; ken agbado laeng kadagiti nalawa a kawes tapno napresko ti rikna.
