Agtaltalinaed a nakangato ti Code White Alert kadagiti ospital, central, ken regional office ti Department of Health iti intero a pagilian a nangrugi sipud idi October 31 ken agpaot agingga November 2.
Iti salinong ti Code White, nasken a nakasagana amin nga ospital ken healthcare worker, agraman dagiti operations center para iti napaspas a pannakibinnulig kadagiti regional ken central office.
Kabayatanna, dua a fully equipped emergency ambulance wenno level 3 ambulance ti nakasagana iti Manila North Cemetery ken Manila South Cemetery no bilang adda dagiti pasiente a kasapulan a maipan iti ospital.
Nagpalagip met ni DOH Secretary Ted Herbosa iti publiko nga ugalienda ti cough etiquette, panagbuggo iti ima, wenno panagaramat iti alcohol.
Mabalbalakadan pay dagiti mapan iti kamposanto nga agbalon iti danum ken itugotda dagiti maintenance nga agasda.
