Indeklarar ti Department of Health ti Code White Alert para iti intero a Semana Santa kas paset iti inda panagsagana kadagiti health-related incident a mabalin a mapasamak kadagiti probinsia, simbaan ken dagiti tourist destination.
Segun iti DOH, mangrugi ti Code White Alert ita nga aldaw, Domingo Ramos, agingga inton Abril 20, Domingo Sabet.
Masansan nga idekdeklarar ti DOH ti Code White Alert kabayatan iti national event, holiday, wenno dagiti selebrasyon a mabalin a mangitunda iti mass casualty incident wenno emergency tapno masigurado ti kinasagana dagiti health facility ken personnel.
Iti salinong daytoy nga alert status, amin dagiti medical personnel, nangruna dagiti adda kadagiti emergency room ken critical care unit, ket nakasagana iti yaadu dagiti pasyente gapu iti aksidente ken dadduma pay a health-related incident a mabalin a mapasamak.
Inallukoy met ni Health Secretary Ted Herbosa ti publiko nga agridam ken agannad tapno masigurado ti natalged a panangrambak iti Semana Santa.
