Binallagaan ti Department of Health (DOH) ti publiko kalpasan nga immaboten kadagiti dadduma a lugar iti pagilian ti haze manipod iti uram idiay Kalimantan, Indonesia.
Iguyguyod ti habagat ti haze nga agturong iti pagilian a pakaigapuan ti narugit nga angin a mangapektar iti salun-at ti publiko.
Maibasar iti Office of the Civil Defense, mabambantayan ti kalidad ti angin gapu iti haze a mangapektar iti dadduma a lugar iti Negros Occidental, Negros Oriental, Siquijor, Cebu, Bohol, ken amin a probinsia iti Mindanao.
Nagpalagip pay ti DOH kadagiti drayber ti pampubliko a lugan, delivery rider, street vendors ken field workers a masansan nga adda iti kalsada a sumurot iti balakad dagiti maseknan nga ahensia tapno maliklikan dagiti sakit a posible a mapasaran gapu iti haze.
