Nagballaag ti Department of Health a nangato ti peggad ti outbreak ti measles idiay Mindanao gapu ta saan pay nabakunaan ti umabot iti 520,645 nga ubbing nga awan pay lima ti tawenna.
Maibasar iti kaudian a rekord ti DOH, umabot iti 2.3 million wenno 82 percent laeng manipud iti target ti nabakunaan kadagiti temporary ken fixed site nga indeploy dagiti lokal a gobierno.
Maipalagip nga inrusat ti ahensia ti Ligtas Tigdas Vaccination a ti gagemna ket masalwadan ti nasurok 2.8 milion nga ubbing idiay Mindanao ken Bangsamoro Autonomous Region in Muslim Mindanao kontra iti measles.
Inyunay-unay ti DOH, a segun kadagiti eksperto ket kasapulan a maragpat ti 95 percent target iti intero a Mindanao tapno magun-od ti herd immunity ken maksayan ti peggad ti outbreak.
