Isagsaganan ti Department of Health (DOH) ti P150 million a pondo kas sungbat iti panagraira ti MPOX outbreak ditoy pagilian, nga umdasen iti tallo a bulan.
Segun kenni Health Secretary Ted Herbosa bayat ti House Appropriations Committee, paset ti panagsaganada ti makinegosasyon ti ASEAN countries tapno makaala kadagiti anti-viral treatment ken bakuna kontra iti MPOX.
Makikamkammayet pay ti ahensiya iti World Health Organization (WHO) tapno mapapigsa ti testing capacity ti Pilipinas.
Iti agdama, ti Research Institute for Tropical Medicine (RITM) ket isu ti national referral laboratory para iti MPOX testing ken genomic sequencing.
Innayon pay ni Herbosa nga ad-adalen itan ti Food and Drug Administration (FDA) ti posibilidad a mangipaulog iti compassionate special permit para kadagiti anti-virals, ken probationary certificate ti product registration ken monitored release para kadagiti bakuna.
