Kinanselar ti Department of Energy ti 11, 427 megawatts a power supply contracts a naited iti Solar Philippines Power Holdings Inc. para iti napalabas a dua a tawen kalpasan a saan a natungpal ti kompania ti production commitments-da.
Segun ken ni Energy Secretary Sharon Garin, dagiti kontrata a naala ti kompania iti salinong ti agduduma a Green Energy Auction Program (GEAP) a nalpas idi Disyembre 2025.
Naipataw iti nasao a kompania ti P24 bilyon a penalty a pakairamanan ti performance funds, kasta met ti contractual obligations ken dadduma pay a financial obligations.
Naammuan a ti Solar Power Company ket kukua ni Batangas 1st District Rep. Leandro Leviste a maipagarup a nagilako ti nasurok P22.59 bilyon shares iti Meralco.
Impasigurado ni Garin a dimmalan iti nainget a due diligence ti amin a kanselasion ken gagemna a mapagtalinaed ti pagilian iti husto nga aramid para iti target renewable energy. Reynand Fontejon
