VIGAN CITY- Saanen a palubosan ti Department of Migrant Workers (DMW) dagiti Filipino seafarer nga agsakay kadagiti barko a nairaman iti panagatake ti grupo a Houthi idiay Red Sea.
Segun kenni Migrant Workers Secretary Hans Leo Cacdac, agtultuloy ti pannakikammayetda ti DMW kadagiti maritime stakeholder mainaig iti security assessment dagiti barko nga aglaylayag iti nasao a lugar.
Karaman iti tignay ti ahensia ti panangiparit kadagiti Filipino seafarer nga aglugan ken aglayag manen kadagiti barko a kukua ti Galaxy Leader, True Confidence, ken Tutor, a nairaman kadagiti major attack.
Innayon pay ni Secretary Cacdac nga addanto affirmation letter ti DMW kadagiti principal ken ship owners dagiti nadakamat a barko a saanen a palubosan dagiti Filipino seafarer nga aglugan nangruna no lumasatda iti Red Sea ken iti Gulf of Aden.
Kabayatanna, nasken a mangisayangkat ti threat and risk assessment dagiti principal ken ship owners no lumasat kadagiti nadakamat a ruta.
Mangisayangkat met ti DMW dagiti security measures kas iti maritime security presence iti nasao a lugar, ken makitinnulongda kadagiti security experts tapno masigurado ti kinatalged ken proteksion dagiti Filipino seafarers.
