Impakaammo da Senador Raffy Tulfo ken Erwin Tulfo a narigat a ma-contact ti opisina ti Department of Migrant Workers, Overseas Workers Welfare Administration, ken Department of Foreign Affairs idiay Middle East iti tengnga ti agtultuloy a tension ti rehiyon.
Iti panagdenggeg ti Senate Committee on Migrant Worker, impaganetget ni Senador Raffy a nakaawat isuna ti reklamo manipud iti overseas Filipino workers a saan a sungsungbatan dagiti hotline ken telepono dagiti nadakamat nga ahensia.
Dinakamat ti senador dagiti komento a maipagarup nga adda sumagmamano nga empleyado ti DMW ken OWWA ti saan a sumsumrek iti trabaho kabayatan a dagiti OFW ket agtultuloy nga agtar-tarabaho iti salinong ti bilin dagiti amo-da.
Kas sungbat, pinasingkedan ni Migrant Workers Secretary Hans Cacdac nga imbestigaran ti nasao a reklamo ken ibaon na ti human resource teams tapno ammoen dagiti empleyado a saan a sumsumrek iti trabaho iti tengnga ti krisis.
