Inallukoy ni Public Highways Secretary Vince Dizon dagiti agtutubo wenno dagiti fresh graduate a makipaset iti reporma ti ahensia tapno labanan ti korapsion.
Iti idadar-ayna iti panangrugi ti DPWH Campus Job Fair iti Mapua University idiay Intramuros, Manila, kinuna ni Dizon a paset iti pammilin ti presidente a mangawis kadagiti dynamic ken idealistic young professional tapno mapunwan ti nasurok 2,000 a bakante a posisyon iti ahensia.
Innayon ni Dizon a kasapulan ti baro a henerasyon ken dagiti propesyonal tapno tumulong iti panangsulbar kadagiti parikut iti DPWH ken dalusan ti hanay ti ahensia.
Naragsakan pay ti opisial iti interes dagiti baro a graduate a binigbigna kas pudno a namnama tapno maital-o ti panagbalbaliw babaen iti tulong dagiti agtutubo.
