Anamungan ni Department of Public Works and Highways Secretary Vince Dizon a maipakita iti publiko ti listaan dagiti imprastraktura a mapapati nga inserrek wenno inyendorso dagiti pulitiko kadagiti napalabas a badyet ti ahensia, a mapapati nga inurnong ni Usec. Maria Catalina “Cathy” Cabral.
Ngem kinuna ni Dizon a masapul a dumalan iti forensic audit dagiti dokumento, agraman ti computer ni Cabral sakbay a maipakita iti publiko.
Manamnama a ruggian ti Office of the Ombudsman ti proseso iti tulong ti Philippine National Police Anti-Cybercrime Group.
Impaganetget ni Dizon a dagiti kopya a naawagan iti Cabral files nga agwarwaras, ken ti inruar ni Batangas 1st District Rep. Leandro Leviste ket saan a dimmalan iti husto nga authentication no di ket napilit laeng a maala iti opisina ni Cabral.
