Impatangken ti Vicar General Archdiocese iti Nueva Segovia nga agtalinaed a saanda a suportaran ti pannakaipatungpal ti divorce iti pagilian.
Iti pannaki-uman ti Bombo Radyo Vigan ken ni Msgr. Cosmenio Rosimo, itakderda iti simbaan nga itultuloy iti pannursuro ni Hesukristo nga awan iti mamagsina ti babai ken lalaki a nagkallaysa a pinagtipon ti Dios.
Inlawlawagna a saan a diborsyo iti solusyon iti parikot nu diketdi adu dagiti rumbeng a maaramid a wagas tapno masimpada nu adda man bilang ti parikotda iti panagdennada.
Segun ken ni Msgr. Rosimo, nupay ammodan iti maipapan ti domestic violence a posible a mangperdi iti maysa a relasyon dagiti agasawa ket mabalin a dumalanda iti marital counselling tapno mapagtalinaed iti singgalot iti ayan-ayatda.
Inyunay-unayna a saan laeng a dagiti agasawa iti maapektaran ta posible a maapektaran pay dagiti annak ken amangan nu abusoen dagiti tattao nu bilang mailinteg ket saandanton nga agbuteng a makisina nga insigida ta nalaka laengen iti pannakiwaswas.
Impatangkenna nga imbes a linteg a mamagsina kadagiti agasawa ket maaddaan laengen ti positive intervention a kas iti panangiyetnag iti marital center wenno family center a mabalin a pakaipanan dagiti addan ti parikot iti marriage-na tapno matulonganda a marisot kadagiti parikotda.
Innayonna nga addaan ti tunggal simbaan ti Commission on Family and Life Apostolate a ti gandatda ket tumulong ken ag-counsel kadagiti agasawa ken kasta payen nga addaan iti programa ti Nueva Segovia ken dadduma nga Diocese inaig ti marriage encounter a seminar-worshop inaig iti panangpasayaat iti relasyon dagiti agasawa ken addaan pay ti Couple’s for Christ movement iti intero a lubong a tumulong kadagiti agasawa tapno masalbarda iti relasyonda.
