VIGAN CITY- Kasapulan ni dati a Chief Justice Maria Lourdes Sereno a pagpanunutan a naimbag iti posible nga iseserrek na ti pulitika, nangruna iti plano na a panagpapili kas senador tapnu saan a makaaramid iti panangiyabutan to kenkuana dagiti kritiko.
Ti ekslusibo a pannaki-uman ti Bombo Radyo Vigan ken ni Atty. Josa Deinla, maysa kadagiti pannakangiwat ni Sereno, inbaga na a gapu ta maka-Diyos ti dati a chief justice ket kasapulan a tingitingen na a naimbag nu iti panagpapili kas senador iti kayat ti Diyos a pagturungan na kalpasan iti pannakapapanaw na iti kangatoan a puwesto ti Korte Suprema.
Kinuna ni Deinla, kalikagum ti dati a chief justice a siguradwen nu ti pulitika iti mangipaay iti pagsayaatan na, pakairamanan iti sibubukel a pagilian ken makatulong kenkuana tapnu maital-o iti napudno a panagserbi kadagiti umili.
Innayon iti pannakangiwat ti dati a chief justice a malaksid ti pulitika ket kayat pay a serreken iti dati nga opisyal iti panagisuro ken panagsubli iti private practice na kas maysa nga abogado.
