Impaganetget ni Interior Secretary Jonvic Remulla a nasken nga adda ordinansa dagiti amin a lokal a gobierno iti intero a pagilian nga adda nadagsen a pannusana a muelta ken pannakaibalud dagiti matiliwan a prank caller ti emergency 911.
Dayta ket dua a lawas sakbay ti rollout ti nationwide unified emergency 911 system.
Segun ken ni Remulla, nasken nga adda monetary fine ken jail time para kadagiti prank caller tapno malapdan dagitoy a mangaramat iti emergency line kadagiti kalolokuanda.
Iti salinong ti baro a sistema ti emergency 911, adda ti tracking capabilities ken adda maaw-awagan a geofence ken geodata tapno al-alisto a mabigbig ken matiliwan dagiti prank caller.
Ti panangpasayaat iti emergency 911 ket paset iti dakdakkel nga addang ti Marcos administration para iti napaspaspas a response time ti kapulisan iti ania man nga emergency situation ken masigurado ti kinatalged ti publiko.
