Nangted ni Interior Secretary Jonvic Remulla ti deadline kadagiti amin a local government units (LGUs) agingga iti Enero 10 tapno mangipasa iti maudi a reportda mainaig iti crackdown ti amin a Philippine offshore gaming operations iti lugar da kalpasan ti pannakaipatungpal ti total ban kadagiti POGO idi December 31 itay napan tawen.
Iti Memorandum Circular 2025-001 nga inruarna idi Enero 2, nai-address kadagiti amin a gobernador, mayor, barangay heads, ken regional directors ti Department of the Interior and Local Government (DILG), a dagiti LGUs ket siguraduenda ti non-renewal ti amin a business permits ken lisensia dagiti POGO ken amin nga internet gaming licenses (IGLs).
Innayonna a rumbeng nga ireport dagiti LGU iti Philippine National Police (PNP) ken field officers ti DILG ti aniaman a business entity a nairaman kadagiti POGO/IGL wenno offshore gaming operations wenno services, iti laksid ti pannakaipatungpal ti Executive Order (EO) 74, wenno total ban dagiti POGO iti pagilian.
