Kinumpirma ni Department of Interior and Local Government Secretary Jonvic Remulla a naiserbin ti subpoena iti opisina ken pagtaengan ni Senador Ronald Bato Dela Rosa mainaig iti maipagarup nga extra-judicial killings idiay Davao region.
Binasa ni Remulla ti subpoena duces tecum ket nabilin ni Dela Rosa a sumango inton Mayo 14 iti PNP-CIDG idiay Quezon City.
Masapul nga agipasa ni senador Bato ti sworn affidavit, dagiti dokumento ken dadduma pay mainaig ti impormasion nga adda pakainaiganna iti imbestigasion.
Nagbalaag ni Remulla a ti saan a panangsurot ti subpoena ket mabalin a basaran para iti panagipila ti kaso nga indirect contempt iti Korte.
Inlawlawag pay ni Remulla nga awan ti pakainaiganna iti patangan ti warrant arrest ti International Criminal Court ti panangpa-subpoena ken ni Dela Rosa.
Kabayatanna, addan ti kumpirmasion manipud ti ICC nga adda ti na-isyu a warrant of arrest kontra ti senador.
