Idurduron ti National Commission of Senior Citizens ti pannakaisuro ti digital literacy kadagiti senior citizen tapno makagiddanda iti napaspas a taray ti teknolohia ken maliklikanda ti maloko iti online.
Segun ken ni NCSC Commissioner Dr. Mary Jean Loreche, kadua ti komisyon ti Department of Information and Communications Technology iti panangipatungpal kadagiti programa para kadagiti lolo ken lola.
9.5 milion a senior citizen ti nakarehistro iti database ti DICT, idinto a ti NCSC ket mapatta-patta a 12 milion ti nairekordda, maibasar iti Philippine Statistics Authority.
Kayat dagiti dua nga ahensia a pagkaykaysaen dagiti impormasyon tapno makabukel iti comprehensive registry ti amin a senior citizen iti pagilian ken maurnos dagiti programa a para iti salun-at para kadakuada.
Kunana a napateg a mabigbig dagiti kangrunaan a kasapulan dagiti babbaket ken lallakay, nangruna iti salun-at, ken dagiti agas wenno maintenance.
