Impalagip ti Land Transportation Office – San Ildefonso District Office kadagiti motorista a napukawan iti driver’s license a mabalin nga usarenda iti digital ID.
Iti pannaki-uman ti Bombo Radyo Vigan ken ni Arnolito Vicente nga OIC iti LTO-San Ildefonso District Office, babaen ti pananglukat iti LTMS Online Portal ket maaddaan ti access ti motorista iti online driver’s license-na nangruna no awan iti maipakitana a physical license wenno card gapu iti pannakapukawna bayat iti panang-flagged down dagiti otoridad.
Segun ken ni Vicente, masapul nga on-the-spot nga ag-log in iti portal a makitkita dagiti apprehending officers tapno mapaneknekan a lehitimo iti lisensia.
No pay kasta ket iparitda nga screenshot laeng iti ipakita ta saanda a mabigbig no kaanno daytoy a na-screenshot ken no lehitimo met laeng.
Impalagipna kadagiti driver a masapul nga ikabesada latta iti client ID-na ken password tapno awan iti agbalin a parikot no kas bilang kasapulan.
Innayonna a no kas bilang napukaw ti lisensia ken agpaaramid manen iti baro iti opisina ket masapul laeng a mangitugot ti driver ti Affidavit of Loss, maysa a government-issued ID ken nasaysayaat no adda police blotter.
