VIGAN CITY – Pammati iti Namarsua ken determinasyon ti tulbek no apay a pimmasa ni Kate Noreen Carasi a taga-Paratong, Narvacan iti Medical Technologist Licensure Examination iti baet ti pandemya.
Iti pannaki-uman ti Bombo Radyo Vigan ken ni Carasi, narigat iti naglasatanna kangrunaan ti panagreview ta para kenkuana, narigrigrigat ti agreview iti online ta saan unay a makapagpokus no yarig idi adda isuna idiay Baguio.
Uray narigatan a nangiproseso kadagiti dokumento a kasapulan sakbay a nakastrek iti Baguio a pakaaramidan ti exam gapu iti kinaadu a requirements kas panangsurot iti protocol ket nagbunga met laeng dagiti rigrigatna agsipud ta dakkel a banag nga impaimana iti Namarsua ti panag-test-na ta dagiti nareview-na ket saan nga isu unay ti rimuar iti eksaminasyon.
Imbalakadna kadagiti mangayat nga agbalin a Medtech wenno dagiti adda arapaapna iti biag kas kenkuana a masapul ti pammati ti Namarsua, determinasyon ken positibo a panagpampanunot tapno magun-odan ti maysa a banag.
Planona a sumrekto iti ospital ditoy probinsia ken maipalagip a manipud kadagiti 3,259 examinee ket 1,259 laeng ti nakapasa.
