Mabalin nga umabot iti Supreme Court ti agbalin a resulta ti impeachment trial ni Vice President Sara Duterte no maaddaan iti isyu iti bilang dagiti botos.
Dayta ti pinasingkedan ni retired Supreme Court Justice Adolfo Azcuna ta mabalin a malabsing ti Senado ti Konstitusion nga isu ti adda turayna a mangaramid iti trial ti impeachment case.
No mapaneknekan a guilty ni VP Sara babaen ti impeachment court uray no saan nga umabot iti kasapulan a 16 a botos, mabalin a makwestionaran iti Korte Suprema no adda alegasion iti grave abuse of discretion.
Iti salinong ti 1987 Constitution, kasapulan ti botos a saan a nababbaba ngem iti 2/3 wenno 16 a senador tapno agbalin a guilty ti maysa nga opisial iti impeachment.
Aminado met ni dati a Senate President Franklin Drilon a mabalin a maidatag ti patangan iti Supreme Court, ngem ti saludsod ket no awaten ti Supreme Court ti kaso ta impeachment ti nasao nga isyu.
