VIGAN CITY – Nagyaman ni Deputy Speaker Deogracias “DV” Savellano kadagiti kadistritona iti impaayda kenkuana a talek, ayat ken suporta bayat ti panagserbina iti probinsia ken distrito a karaman iti innem a tawen a terminona kas representative ti kongreso.
Iti public statement ni Savellano, sipapakumbaba a nangipakaammo a nagbalin a diputado ken presidente ti Northern Alliance.
Sipapasnek a nasursurona dagiti naituding nga aramidenna babaen ti saanna a panaglangan iti amin a sesyon ti kamara ken committee hearings gapu ti kalikagumna nga adu ti maalana a pondo ken serbisyo nga agpaay kadagiti kalugaranna.
Babaen ti napasnek a panagserbina ket nakaaramid kadagiti proyekto a nangpadur-as iti distrito ken probinsia kas ti pannakapasayaat ti Salomague Port, Vigan Airport Development, school buildings ken dadduma nga istraktura; dagiti kalsada a namagsilpo iti Ilocos Sur iti kabangibang a probinsia ti Ilocos Norte ken Abra, Diversion ken Bypass Roads iti Banaoang-Bantay-Vigan, Aggay-Bantay Vigan, Bantay-San Ildefonso, coastal road a namagsilpo iti Vigan Airport ken Salomague Seaport Cabugao, panangrugi ti Circumferential Road ken dadduma pay.
Malaksid dayta, nalpas payen ti Barbar San Juan Dam ken maar-aramid ti Gaco Cabugao Dam ken Ilocos Norte-Abra Integrated Project a pakairamanan iti ili a Sinait tapno umadu ti produkto iti benneg ti agrikultura.
Iti benneg ti turismo, napagbalinna a linteg ti pannakaideklarar iti San Vicente a Heritage Zone ken iti National Cultural Treasure, panangpreserbar iti Magsingal Cultural Coimplex ken ti pannakailatag ti cobblestone iti Vigan Heritage Village.
Iti benneg ti salun-at ket ti pannakaaramid ti Barangay Health Stations, panangipaay iti nadumaduma a medical equipment, pannakaipatakder ti Provincial Health Stations, panangipaay iti nadumaduma a medical equipment, pannakaipatakder ti Provincial DOH building idiay Government Center, San Ildefonso karaman dagiti dadduma nga opisina ti gobierno.
Kabaytanna, tapno ad-adu met ti matulonganna ket nagbiruk kadagiti makasapul iti tulong ken serbisyo babaen ti “Text me anytime” program a nangitedanna iti personal a numerona kas maysa nga ama a mangkita iti pagsyaatan ti anakna tapno matulongan dagiti saanen a maibilang a kakabsat iti benneg ti edukasyon, salun-at nangruna iti tiempo ti pandemya ken social services iti opisina.
Babaen iti Savellano DeliVers a programa, napalag-anan ti panangidanon iti serbisio dagiti foodpacks, yero ken daddumapay.
