Pinasimple ti Department of Education (DepEd) dagiti kasapulan a dokumento para iti panag-enroll kadagiti pampubliko a pagadalan iti intero a pagilian ta gagem a makissayan ti rigat dagiti pamilia.
Segun ken ni Education Secretary Sonny Angara, mangrugi ita nga adda ti klasen ket maminsan laeng nga agipasa ti birth certificate ti agad-adal pata iti intero a K to 12 education uray immakar pay iti pagadalan.
Dayta ket iti baet a parikot dagiti nagannak dagiti dokumento a napukaw, nadelay wenno kasapulan pay nga iproseso manen tapno maipasa para iti enrollment.
Iti salinong ti baro a pagannurotan, dagiti agad-adal nga ag-enroll iti umuna a gundaway ket rumbeng nga agipasa ti orihinal wenno maysa a certified true copy iti PSA-da wenno NSO-issued birth certificate. Nu saan nga available iti panawen ti enrollment ket mabalin nga agipasa dagiti nagannak iti alternatibo a dokumento agingga October 31, ket maipasantro laengen ti birth certificate inton maalan.
Segun ti DepEd, awatenda ti range of secondary documents pakairamanan ti National ID, aniaman a primary government-issued ID, Certificate of Live Birth, Marriage Certificate, PhilHealth ID, PWD ID, Barangay Certification, Affidavit of Undertaking a pinirmaan ti nagannak wenno guardian, NSO/PSA-issued Certificate iti Foundling, ken Baptismal Certificate.
Adda pay naaramid nga special provisions para ti Persons Depreived of Liberty ken residente iti rehabilitation facilities a naka-enroll iti Alternative Learning System (ALS) ta mabalinda nga agipasa iti aniaman a certificate of proof of identity iti ALS teacher-da.
Ti enrollment ket mabalin a maaramid babaen ti in person wenno remotely, para ti in-person registration ket rumbeng agipasa dagiti nagannak ti Basic Education Enrollment Form (BEEF) ken kasapulan a dokumento iti pagadalan.
Dagiti agad-adal nga addan iti legal age ket mabalin nga ag-enroll nga isuda laengen idinto a dagiti menor de edad ket masapul nga adda ti form a napirmaan ti nagannakda wenno legal guardian.
