Nagyaman ti Department of Education (DepEd) kadagiti financial institution a simmungbat iti panawaganda a maintantan pay laeng iti panagbayad ti loan dagiti mangisursuro ken non-teaching personnel.
Segun iti DepEd, mangipatungpal ti maysa agingga uppat a bulan a moratorium iti loan payment iti duapulo ket uppat a financial institution manipud Enero agingga Abril ita a tawen 2025.
Pakairaman ditoy ti DepEd Provident Fund, First Consolidated Bank, A Private Development Bank, Manila Teacher’s Mutual Aid System, Inc., Philippine Public School Teachers Association, Inc. ken Rural Bank of Malolos, Inc.
Tallo a bulan a moratorium ti ipatungpal ti Land Bank of the Philippines, Beneficial Life Insurance Company, Inc. ken Camarines Sur Elementary ken Secondary Teachers and Employees Association, Inc.
Maysa a bulan a moratorium met ti ipangtungpal ti sangapulo ket innem a nabatbati a financial institutions.
Maipalagio nga immunan nga inbaga ni Education Sec. Sonny Angara, a kayatna a maaddaan ti loan relief dagiti mangisursuro ken School Personnel tapno maka-recover dagiti naapektaran iti naglabas a bagyo.
