Pinasingkedan ti Department of Education Las Piñas City nga agisayangkat da ti nainget nga imbestigasion mainaig iti napasamak a pammagsol a nakatayan ti Grade 9 student iti uneg ti Las Piñas National High School.
Segun iti DepEd, nakibinnuligen ti Schools Division Office ti Las Piñas City iti Philippine National Police (PNP), dagiti opisial ti barangay ken dadduma pay a lokal nga otoridad tapno maammuan ti buo a pasamak.
Kagiddan daytoy, maisaysayangkat metten ti administrative review iti maipatpatungpal a security measures ken dagiti protocol ti pagadalan.
Mangipatulod pay ti DepEd dagiti School Guidance Advocate tapno mangted ti psychological first aid ken psychosocial support kadagiti estudyante, mangisursuro ken non-teaching personnel a naapektaran ti insidente.
Impasigurado ti SDO nga agtultuloy da a makibinnulig iti amin a maseknan nga ahensia tapno masigurado a natalged dagiti pagadalan para kadagiti estudyante.
