Nagiruaren ti Department of Environment and Natural Resources (DENR) ti cease and desist order kontra ti operator ti sanitary landfill idiay Cebu City a nagreggaay idi napan a lawas bayat nga agtultuloy ti imbestigasion iti napasamak nga insidente.
Segun ti DENR, ti bilin ket inruar ti regional office kontra ti Prime Integrated Waste Solutions, Inc. (PIWSI), a dati a maaw-awagan ti ARN Central Waste Management, Inc.
Daytoy ti kompania a mangpat-pataray ti Binaliw Sanitary Landfill idiay Barangay Binaliw, Cebu City.
Basar iti cease and desist order, nabilin ti pasilidad nga isardeng ti amin nga operasion ti sanitary landfill pakairamanan ti panagawat ti basura, kalaksidan ti maisaysayangkat a rescue, retrieval ken cleanup operations nga ar-aramiden dagiti agduduma nga ahensia.
Pinasingkedan ti DENR nga agisayangkat-da ti komprehensibo nga imbestigasion tapno maammuan no ania ti rason ti panagreggaay ti daga. Reynand Fontejon
