Inruaren ti Department of Environment and Natural Resources (DENR) ti nalpasda a draft iti National Flood Management Framework.
Dayta ket maysa a komprehensibo ken napaut a polisiya a gagem a kissayan dagiti peggad gapu iti panaglayos iti intero a pagilian.
Ti nasao a framework ket nakabasar iti prinsipyo ti Integrated Water Resources Management (IWRM) a mangipaganetget iti holistic management dagiti pagalaan iti danum.
Imbes nga agbalin a reactive iti panawen ti didigra ket gagem nga agbalin a proactive babaen iti panangiyakar nga agturong iti maysa nga integrated ken sustainable a wagas iti water management.
Segun ken ni DENR Secretary Raphael Lotilla, ti National Flood Management Framework ket agserserbi a pannarabay iti pananginaig iti agduduma a proyekto ken programa nga isaysayangkat iti agduduma nga ahensya iti gobierno ken dagiti Local Government Unit.
