Nagpanawagan ti Department of Environment and Natural Resources wenno DENR iti publiko ken kadagiti lokal a gobierno a pabilgen ti solid waste management wenno naurnos a panangimanehar iti basura.
Segun iti DENR, kangrunaan a responsibilidad daytoy ti local government unit, agraman ti waste segregation, panagkolekta, resource recovery, recycling, ken dadduma pay kas maisurot iti Republic Act No. 9003 wenno Ecological Solid Waste Management Act of 2000.
Kinunada a napateg ti panangipatungpal iti kada komunidad ti husto a panangimanehar iti basura tapno maliklikan ti pannakayanudna iti layus a mapan kadagiti kanal, waig, Karayan, kabaybayan, ken Manila Bay, nangruna iti agtultuloy nga epekto ti habagat kadagiti dadduma a lugar iti pagilian.
Inlawlawag ti ahensia a natural phenomenon ti habagat ngem adda latta kadagiti Pilipino ti panangimanehar iti basura tapno saanna a sullatan dagiti pagayusan ti danum, a maysa a mangitunda iti nakaro a layus.
