VIGAN CITY – Kinumpirmaran ti Ilocos Sur provincial government ti pannakastrek ti Delta variant ditoy probinsia a nakaapektaran dagiti lima a tao idinto a saggaysa ti nairekord a kaso ti Alpha ken Beta variant.
Dagiti apektado a lugar ditoy probinsia iti Delta variant ket pakairamanan ti Brgy. Saoang, San Juan; Salapasap, Cabugap; Casili, Sto. Domingo; ken Bahet, San Ildefonso.
Iti Alpha variant ket inapektaranna met ti Alinaay, Cabugao idinto a ti Nagsangalan, Vigan City ket naapektaran iti Beta variant.
Nupay kasta, impaganetget ni Gov. Ryan Singson a disiplina ti kangrunaan a panglaban iti Covid19 a buyogan ti panagbakuna tapno maliklikan ti pannakayospital ken pannakatay.
Malaksid ti pananglimitar ti pappapanan ket masapul nga itultuloy ti sumurot kadagiti protocol, mapan agpa-test ken agpa-isolate no makarikna iti sintomas tapno masalwadan ti pamilia ken komunidad.
Ti kaadda ti Delta variant ditoy probinsia ket awag tapno agbalin a responsable ti tunggal maysa a mangaramid ti akemna iti laban kontra Covid19.
