VIGAN CITY – Nanayunan ti innem a kaso ti delta variant iti llocos Sur kas impakaammo ni Gov. Ryan Singson.
Maysa ti naggapu iti Bulag, Bantay nga agtawen ti siam a lalaki ken addaan ti sintomas a naggurigor.
Maysa ti naggapu iti Cabangaran, Santa, babai nga agtawen ti tallopulo ket maysa, naguyek, awan ti panagramanna ken narigatan a naganges.
Dua ti naggapu iti ili ti San ildefonso, nga agtawen ti sangapulo, babai nga asymptomatic, ken lalaki nga agtawen ti maysa nga adda sintomas na a gurigor.
Dua ti naggapu iti ili ti San Vicente, ti maysa ket babai nga agtawen ti uppat a pulo ket pito, mangisursuro, naggurigor ken nagkakapsot iti sintomasna, ken lalaki nga agtawen ti tallopulo ket dua a naguyek, panateng, marigatan a naganes ken nagkakapsot.
Dagiti resulta ket naggapu iti Department of Health Center for Health Development Regional Office 1 ket agtultuloy iti panagpalagip ti lokal a gobierno iti publiko a sumurot kadagiti health protocols tapno saanen nga umado ti kaso ti virus.
Malaksid iti dayta ket inyunay-unay met ni Bantay Mayor Samuel Parilla kadagiti umili iti panangsurot iti nainget a health protocols kalpasan a nairekord iti kaunaan a kaso ti delta variant iti nasao nga ili.
Maibasar ti inruar a pakammo ni Parilla, kiddawna a saan a laklakaen iti sitwasyon ta kasapulan latta a sumurot ti pagannurutan babaen iti paagaramat ti face mask ken face shield; stay at home, saan a rumuar nu saan a kasapulan, panangliklik ti gatherings ken panagtalinaed a nasalun-at ti bagi.
