Ipalpalubos ti Department of Labor and Employment (DOLE) kadagiti delivery rider ti agkedked iti panangipatulod iti taraon ken parcel no napeggad unay ti kinabara gapu iti El Niño, a manamnama a marikna manipud Nobiembre agingga umuna a paset ti sumaruno a tawen.
Iti salinong ti labor advisory, awtomatiko a masuspenso amin nga outdoor delivert no umaboten iti 52°C agpangato ti heat index, idinto a mabalin met nga agkedked dagiti rider iti delivery no umaboten iti 42°C agingga 51°C ken awan ti pannusa a maipataw kadakuada.
Mabilin pay dagiti online platform a pakaammuan dagiti rider ken customer mainaig iti kasasaad ti paniempo ken ti posible a pannakaitantan dagiti delivery.
Maal-allukoy pay dagiti mall, gasolinaan, condominium ken pasdek ti opisina a mangikabil iti paglinungan ken paginanaan dagiti rider kabayatan ti naituding a panangiruar ti DOLE iti final labor advisory inton umay a lawas.
