VIGAN CITY – Kiddaw ni Herald Vitamog a maysa a delivery rider kadagiti aggatang iti online a kitaenda a nalaing iti review, comment ken ratings iti paggatanganda tapno sigurado nga isu ti maawatda ti inorderda apaman a maideliver.
Iti pannaki-uman ti Bombo Radyo Vigan ken ni Vitamog, rumbeng nga agbalin a naalibtak iti panaggatang ken saan a dagus a patien ti makita iti online ta posible a saan a pumada iti ma-orderda.
Dayta ket kalpasan a napagsawsaw-an, nabugkawan, ken naisipat iti maysa a parcel ken ni Vitamog ta saan a nagustwan ti naawat a delivery item ti pinatulodanna idiay Balaleng Centro, Bantay, Ilocos Sur partikular iti Yolanda Homes.
Segun ken ni Vitamog, nagreklamo ni Jimmy Belen ta saan nga isu iti naawatda a parcel ta sabali ti inorder ti anakna ket gapu ti pungtotna, linayatanna ken pinagsawsaw-anna ngem adda pay ti saanna a nabigbig a nangsipat kenkuana ti parcel.
Maladingitan ni Vitamog iti pasamak ta ti panagriknana ket matagtagibassitda a delivery riders ken mapabpabasolda pay kadagiti madi a maawat dagiti patulodanda.
Inlawlawagna a ti katransaksyon ti buyer ket ti online seller isu nga aniaman a madi a maawatda ket isu iti contact-enda tapno makasaritada inaig iti pannakasukat wenno refund ti inorderda.
Kabayatanna, nakasagana ni Belen nga ilawlawag iti kalinteganna inaig iti nasao a pasamak.
