VIGAN CITY – Kaso a qualified theft ti sangwen ti maysa a lalaki a nagtakaw iti kurong-kurong a naglaon iti siam nga LPG ken pagkilwan idiay Jose Singson Street, Barangay VIII, Vigan City.
Nabigbig ti biktima a ni Lilia Tabarnilla Barba, agtawen iti limapulo ket lima, negosyante, taga-Barangay Pantay Daya, Vigan City.
Ti met suspek ket ni Mark Vinuya Gamboa, taga-Barangay Bonuan Gueset, Dagupan City, Pangasinan.
Personal a nagturong ti biktima iti Vigan City Police Station a nangipakaammo a mapukpukaw ti kurong-kurongna.
Segun iti biktima, alas otso iti rabii ti May 26 idi pimmanaw iti business establishment na ket imparkingna ti kurong-kurong iti uneg nga adda tulbekna ket nakaandar ngem sakbay a nagawid, sinaludsod ti delivery boy nga isu ti suspek no mabalinna ti maturog iti sangwanan ti establisimiento.
Pinagtalkan met ti biktima ti suspek ket binilinna nga isarrananto ti establisimiento.
Alas siete iti May 27, idi sumangpet ti biktima, nakalukat ti establisimiento ken mapukpukawen ti kurong kurongna nga adda siam nga LPG ken pagkilwan.
Ket idi kinitada ti CCTV footage, natakuatan a ti drayber ket inikkatna ti saksakan ti CCTV ken mapukpukawen ti kuartana nga aggatad iti PHP30K a naipan iti drawer ti lamisaanna.
Pinadasna pay a contacten ti drayber ngem saandan a macontact.
