Nadismaya ti Defend Ilocos Sur iti panagsubli ti inawaganda a makadadael a dredging operation kalpasan a makita nga adda manen dagiti barko a pang-dredging iti Lower Abra River.
Daytoy ket kasaruno ti nagbalin a reinstatement order ti Department of Environment and Natural Resources 1 iti Memorandum of Agreement ti Isla Verde.
Iti pannaki-uman ti Bombo Radyo Vigan ken ni Defend Ilocos Sur Convenor Clio Rojas, babalawenna no apay a nagdaras a mapatgan ti motion for reconsideration ti Isla Verde.
Kwinestyonaran pay ti grupo ti reinstatement ti MOA ti Isla Verde agsipud ta saan a kayat ti DENR-RO1 nga iruar ti pagibasaran no apay a naisubli ti katulagan iti uneg laeng ti 24 nga oras, uray no nagkiddawda iti pormal a pannakailawlawag.
Kinuna ni Rojas a nalawag dagiti panaglabsing ti Isla Verde kas koma ti nasurok maysa tawen nga operasionda iti navigational channel iti ruar ti River Dredging Zone ti Isla Verde a mapalpalubosan laeng iti uneg ti 6 a bulan nga awan ti inisyal nga Environmental Compliance Certificate-na (ECC).
Saan pay a nakapatang dagiti oppositor kadua ti Defend Ilocos Sur ken Archdiocese of Nueva Segovia iti reinstatement ti kompania iti MOA.
Agtultuloy ti panangikalintegan ti grupo a daytoy nga addang ket maibilang a panangdadael iti baknang ti probinsia ken ti aglawlaw.
