VIGAN CITY – Nakasaganan a makipaset dagiti deboto ni Nuesta Señora de la Caridad Bantay para iti maika-uppat a pulo ket maysa a Grand Marian Procession idiay Intramuros inton December 4 a daytoy ket maysa kadagiti highlight iti Feast of the Immaculate Concepcion.
Iti pannaki-uman ti Bombo Radyo Vigan ken ni Michael Palacpac, maysa kadagiti makipaset iti nasao a selebrasyon, narigatanda bassit iti inda panagsagana para ti maikapat a pannakipaset ni Apo Caridad iti Grand Marian Procession ta naladaw ti pakaammo manipud iti organizer ti Intramuros administration.
Nasurok limapulo ti sumurot a deboto manipud ti nadumaduma nga ili ditoy probinsia para ti Grand Marian Procession ket inallukoyna dagiti mangayat a kumamakam ta adda pay dua nga slot iti paglugananda a bus.
Kabayatanna, kas maysa a deboto, pinasingkedan ni Palacpac a ti nasao a parambak ket dakkel a gundaway a mangital-oi iti debosyon ken ni Apo Caridad ta uray kasano kabannug ti padas a makipaset ket naragsak iti rikna ken malaksid dayta, gundaway pay a maingipakita iti turismo ti kada probinsia.
Iti agdama, dagiti laeng tallopulo ket innem a pontifically crowned ti makipaset iti nasao a parambak ket adda iti maikatallopulo a karosa ni Apo Caridad.
Alas dos ti malem inton ti December 4 ket maangay ti Misa Hermano, sumaruno ti bendisyon ken alas kuatro iti malem ket isu ti pannakailibot dagiti marian.
