Nagpalagip ni Rev. Fr. Willie Jones Ducusin, Parish priest ti Minor Basilica of St Nicolas de Tolentino And Shrine of Sto Cristo Milagroso de Sinait kadagiti nasken nga itugot wenno aramiden dagiti mapan makipiesta ken ni Apo Santo Cristo Milagroso inton Mayo 3.
Iti pannaki-uman ti Bombo Radyo Vigan ken ni Fr. Ducusin, iti kinabara ti panawen ket masapul nga agkawes iti husto, aglinong ket saan nga agkainaran ken agitugot iti danum.
Inton kaaldawan ti piesta, Mayo 3 ket addanto misa concelebrada iti 4:00 AM, 5:30 AM, 7:00 AM, 8:30 AM ken 10:00 AM nga idaulwan ni Archbishop Marlo M. Peralta ken dagiti padi.
Iti malem, maaramid ti misa iti 2:00 PM, 3:30 PM ken 5:00 PM ket kalpasan ti maudi a misa, maaramidto met ti nangayed a libut.
Kas panagsagsagana iti daytoy a rambak ket inrugin ti simbaan ti Novena para ken ni Santo Cristo Milagroso idi April 24, agpaot iti siam nga aldaw isu a malpasto inton Mayo 2.
Malaksid dayta, adda pay naaramid a Traslacion wenno ti pannakaipan ti imahe ni Apo Lakay idiay Dadalaquiten, Sinait ken nailibut a naisubli iti simbaan.
Nupay kasta, inawisna dagiti deboto nga ipakita ti panagdebosyonda babaen iti panangsarungkar, panagagep iti imahe ni Apo Lakay ken pannakimisa iti aldaw ti kapiestaan.
