Kinablaawan ti Dean iti University of Northern Philippines – College of Engineering dagiti amin a pimmasa iti 2025 Sanitary Engineers Computer-Based Licensure Examination a nagturpos iti nasao nga unibersidad.
Iti pannaki-uman ti Bombo Radyo Vigan ken ni Nelia Verzosa, ti laeng kararagna ket maartapanda ti national passing rate isu a saanna a mailadawan ti ragsakna nga adda agbalin a topnotcher nga isu ni Jansen John Costales nga adda iti maikapat a puesto.
Kas paset iti panangisagana kadagiti examinee ket nangidiayada iti libre a review kadakuada ta dagiti mangisuro kadakuada ket dagiti met laeng nakapasa idi kallabes.
Sangapulo ket maysa ti pimmasa manipud iti sangapulo ket pito a first takers, katukad iti 64.71 percent idinto a dagiti retakers ket tallo ti nakapasa manipud iti siam a nagexam, katukad iti 33.33 percent.
Balakadna kadagiti saan a nakapasa a saanda a maawanan iti namnama, agreview-da a nasayaat ta dumtengto ti tiempo a magun-odda met laeng ti arapaapda ken saanda a lipaten ti agkararag.
