VIGAN CITY – Ita nga aldaw ti naituding a deadline para iti panagipasaan iti aplikasyon para iti tallopulo ket maysa nga slot iti Special Program for the Employment of Students a maidiaya kadagiti enrolled students ken dagiti out-of-school youth.
Ti SPES ket programa ti Department of Labor and Employment, kabinnuligda ti City Government of Vigan.
Iti pannaki-uman ti Bombo Radyo Vigan ken ni Ronilda Aninag, Chief, Manpower Development Office ken PESO Manager ti Vigan City, gagem ti programa a maikkan iti pagsapulan dagiti estudiante ken dagiti out of school youth tapno iti sumaruno a panagseserrek ket adda pangsupusupda kadagiti paggastoanda.
Duapulo nga aldaw ti panagtrabahoda ket agsueldoda iti PHP502.27 iti kada aldaw.
Baklayen ti Vigan City government ti 60 percent ti sueldoda idinto a 40 percent met ti DOLE.
Dagiti qualified iti programa ket dagiti agtawen iti sangapulo ket lima agingga tallopulo a deserving ken marigrigat nga estudiante, saan a mabalin dagiti annak dagiti government employee ken elected employees.
Dagiti requirement nga ipasada ket certificate of indigency, latest grades, ken PSA birth certificate wenno baptismal para kadagiti enrolled students idinto a certificate of indigency, certificate of out of school youth ken PSA birth certificate wenno baptismal para kadagiti saan nga agbasbasa.
Iti agdama, addan ti pitopulo ket innem nga aplikanten ket agtultuloy ti panangawatda kadagiti sumarsaruno pay.
