Pinasingkedan ni House prosecutor ken Mamamayang Liberal Party-list Rep. Leila de Lima a mapapati a mangpapigsa ti kaso iti prosekusyon ti sumaruno a testigo manipod National Bureau of Investigation (NBI) iti panagtultuloy iti impeachment trial ni Vice President Sara Duterte inton sumaruno a lawas.
Dayta ket sakbay iti nakaituding a panagsango ni NBI Regional Director ken Senior Agent Atty. Jeremy Lotoc iti impeachment trial.
Maipanggep dayta iti maikapat nga Article of Impeachment a mangtratratar iti mapapati a pangta ni Duterte kada Pres. Ferdinand Marcos Jr., First Lady Liza Araneta-Marcos ken dati nga Speaker Martin Romualdez.
Segun ken ni de Lima, ipalawag ni Lotoc a head agent iti imbestigasyon iti mapapati a panagpangta, no kasano ken apay a naadal dagiti video ni Duterte a naipakita ken na-authenticate iti immunan a testimonia ni NBI Senior agent John Mark Calilung, kasta payen ti nagbalin a resulta iti imbestigasyonda.
