Nangipila iti resolusyon ni House Deputy Minority Leader ken Mamamayang Liberal Rep. Leila de Lima tapno simpaen iti pannaka-implementar ti Rice Tarrification Law iti baet iti nangina a presyo iti bagas.
Iti House Resolution 645, kinuna ni De Lima a pimmigsa ti panawagan dagiti mannalon ken consumer group nga isubli ti regulatory ken market intervention power iti National Food Authority (NFA).
Segun ken ni De Lima, ti maysa a systematic review iti implementasyon ti RA 11203 ket gagem a mabigbig dagiti mayannatup a policy intervention tapno mapalaka ti presyo iti bagas, masigurado ti seguridad iti taraon iti pagilian ken agaramid ti safeguard kontra iti panagabuso, inefficiency wenno manipulasyon iti merkado.
Iti RA 11203 a nagbalin a linteg idi 2019 ket naipangato ti buwis iti imported a bagas ken nalimitaran ti bileg ti NFA.
