Kontraen ni House Deputy Minority Leader ken Mamamayang Liberal Partylist Rep. Leila de Lima ti panangamyendar iti 1987 Constitution no daytoy ket para iti term extension dagiti nakatugaw ken panangikkat iti term limits dagiti opisial ti gobierno.
Sisasagana ni De Lima a lawlawagan ti probision ti Konstitusyon iti impeachment, pagbalinen a self-executing ti probision iti panangiparit iti political dynasties, ken panangamyendar kadagiti sumagmamano nga economic provision.
Segun ken ni De Lima, pabor daytoy a pagpatangan ti Senado ken Kamara ti panangamyendar iti 1987 Constitution kas sungbat iti nagbalin a decision ti Korte Suprema iti kaso nga impeachment kontra ken ni Vice President Sara Duterte.
Iti decision ti Korte Suprema iti impeachment case ni Duterte, intudingna ti pagannurotan a nasken a suroten ken maikontra kadagiti immuna a nagbalin a decision ti High Tribunal.
