VIGAN CITY – Suportaran ti Department of Budget and Management ti panawagan dagiti health experts nga iyatiddog ti immunization program kontra papillomavirus wenno HPV kas panangkissay ti kaso ti cervical cancer iti pagilian.
Segun ken ni Budget Secretary Amenah Pangandaman, suportaranna ti singasing ti Department of Health nga iyatiddog ti HPV immunization program para kadagiti babbai, kagiddan ti panagakemda para iti pananglaban ti cervical cancer a gappuanan ti HPV infections.
Kinuna ni Pangandaman a kas babai ket maawatanna ti kinapateg tapno masalakniban kontra kadagiti sakit a kas ti cervical cancer a masansan a pangta kadagiti babbai.
537 million ti nailatang para ti HPV vaccine program iti 2024 General Appropriations Act ket adda pay plano a manayunan ti pondo.
