Nagpanawagan ni Manila 6th district Rep. Rolando Valeriano iti gobierno a maparmek iti maawawagan a “Davao Mafia” a nangipaay iti proteksion ken ni Pastor Apollo Quiboloy a sumangsango iti nadumaduma a kaso kas iti human trafficking, ken child abuse.
Inyunay-unay ni Valeriano a masapul a maparmek ti kasla mafia system ti gobierno babaen ti pannakitinnulong dagiti pribado nga opisina iti Siudad ti Davao nga immanamong a mapalubosan ni Quiboloy a mangbangon iti underground facility iti Kingdom Of Jesus Christ wenno KOJC compound.
Segun kenni Valeriano, adda koma ti “general cleaning” tapno madalusan ti korupsyon a gapuanan ti panagbaknang ni Quiboloy.
Kiniddaw pay ni Valeriano ti pannakaisayangkat ti imbentaryo dagiti paltog, bala, eksplosibo ken makadangran a kemikal nga adda iti kustodiya dagiti sumagmamano a tattao idiay Siudad ti Davao.
Malaksid iti daytoy, inyunay-unay pay ni Valeriano ti panang-raid ken panangparmek dagiti otoridad kadagiti amin a Philippine Offshore Gaming Operators wenno POGOs ken peke a BPO iti Siudad ti Davao.
