VIGAN CITY- Patien ni dati a presidential spokesman Harry Roque a nganganin permaan ni Presidente Rodrigo Dutete kas linteg ti Universal Health Care Bill nga inapprubaran ti bicameral conference committee idi kalman a mangipaay ti health benefits kadagiti amin a Pilipino.
Ti exclusive interview ti Bombo Radyo Vigan , kinuna ni Roque a maysa kadagiti addda iti likodan ti Universal Health Care, a libren ton ti panagpaagas dagiti amin nga umili ,nangruna dagiti basic medical services kadagiti pribado ken pampubliko nga ospital ta ti agbayad ket ti National Health Insurance Corporation.
Inlawlawag ni Roque a sakupen dagiti amin a Pilipino ti gakat ngem desisyon dagiti dadduma no kayat da ti agbayad ti nayon a health insurance ken benefits iti PHILHEALTH ken dadduma pay a pribado a health insurance companies.
Pinatalgedan pay ti dati nga agpanpanday linteg a sakupen ti linteg ti serbisyo medical iti mental health a maiyannatup ti agdama a panawen gapu iti kinaado ti kaso ti panagpakamatay nangruna kadagiti agtutubo.
