Sinublian ni dati a Presidential spokesperson Atty. Harry Roque ti naawatna nga impormasyon manipod iti maysa nga empleado iti ICC detention facility nasurok makabulanen iti napalabas manipod naipakaammo a na-ospital ni dati President Rodrigo Duterte.
Segun ken ni Roque, pinasingkedan ti informant-na a saan dayta a routine check-up, kabaliktad iti rimmuar a report, nu diketdi timmama iti ulo ti dati a president ta natinnag bayat a magmagna ken naidalan ti Magnetic Resonance Imaging (MRI).
Inaramid ni Roque iti sarita kalpasan nga imbaga ni Vice President Sara Duterte a nakaawatda iti impormasyon a nasarakan ni dati a President Duterte nga awanan ti puot iti datar iti kuartona ken naidalan iti laboratory tests nga awan ti permiso manipod iti pamiliana.
Ngem inlawlawag ni Roque a saanna a masigurado nu ti nasao nga insidente nga imbaga ni VP Sara ket kapada iti naawatna nga impormasyon.
