Nakipagladingit ni dati nga Ilocos Sur Police Provincial Director Pcol. Jugith Del Prado iti pamilia ti gayyem ken dati a kaadalanna a pulis a natay iti panagdinnungpar ti eroplano ken helicopter idiay Washington, DC a ni Pcol. Pergentino Malabed Jr., tubo iti Zone 5, Bantay, Ilocos Sur.
Iti pannaki-uman ti Bombo Radyo Vigan ken ni Police Colonel Del Prado, gayyem ken dati a kaadalanna ni Malabed Jr. ta nagam-ammonda sipud nagbalinda a kadete ken nagkadkaduada idiay Camp Crame.
Inladawan ni Del Prado ni Malabed kas maysa a madaydayaw nga opisial, gentleman ken promising officer isu a pakalidayan ken dakkel a pukaw kadakuada ti pannakatayna iti biang ti Philippine National Police.
Ni Malabed Jr. ti Pilipino a pulis a nairaman kadagiti innem a pulo ket pito a biktima iti nasao nga aksidente.
Isu ti opisial a napili nga agbiahe para iti pre-delivery inspection ti 2,675 nga all purpose vests para iti PNP.
