Kinumpirma ni Senate President Pro Tempore Panfilo “Ping” Lacson a karaman ni dati nga House Speaker Martin Romualdez kadagiti nairekomenda a makaswan iti draft report ti Senate Blue Ribbon Committee mainaig iti maanomalya a flood control projects.
Inlawlawag ni Lacson a karaman ni Romualdez iti maikadua a kategorya dagiti personalidad a nadakamat iti panagdengngeg, dagiti indibidwal a ti nagan da ket adda iti testimonya dagiti testigo ngem awan ti direkta nga ebidensia a mangipakita nga immawat da ti kuwarta.
Nupay inakusaran ti surprise witness a ni Orly Guteza ti panangipatulod ti kuwarta kada Zaldy Co ken Romualdez ket awan met ti pammaneknek wenno ebidensia nga immawat ti kickback ti dati nga house speaker.
Dinakamat pay ti senado dagiti alegasion a pannakainaig ni Romualdez kadagiti contractor a da Sara ken Curlee Discaya a mangibagbaga a nausar kas “front” iti panaggatang ti maysa nga high-end a sanikua idiay Makati City.
Kabayatanna, pinasingkedan ni Lacson nga agisayangkat ti taripnong dagiti senador manipud iti majority bloc tapno mapagpapatangan dagiti isyu mainaig iti draft report ti Blue Ribbon Committee.
